«Су тасқыны Жамбыл облысына да жетті»
Әлеуметтік желіде Жамбыл облысы, Жамбыл ауданының аумағындағы Жасөркен ауылын су шайып жатыр деген ақпарат тарады, деп хабарлайды Nege.kz.
Облыс әкімдігінің баспасөз қызметінің мәліметінше, тосыннан келген тасқын су облыс басшылығының толық бақылауында.
«Жамбыл ауданы, Жасөркен ауылындағы жағдай бақылауда. Аталған аумақта жұмыстар жүргізілуде. 2024 жылдың 15 сәуірінде сағат 20:35-те Жамбыл ауданы Жасөркен ауылында қатты жауын-шашынның салдарынан Жасөркен көшесіндегі 7 ауланы (№54, 52, 50, 48, 49, 51, 53) және М.Әуезов атындағы орта мектеп аумағын су басқандығы туралы ақпарат келіп түсті. Қазіргі уақытта оқиға орнында жергілікті атқарушы органдар, ТЖД-нен 51 адам, төрт бірлік техника (екі тиегіш, екі экскаватор), 10 бірлік техника және алты мотопомпа жұмыс істеуде. Жағдай облыс әкімі Ербол Қарашөкеевтің жеке бақылауында», – деп айтылған ресми хабарламада.
«Cу тасқыны: БҚО-да стратегиялық нысандар бақылауға алынды»
Батыс Қазақстан облысында су тасқыны кезеңінде стратегиялық нысандар бақылауға алынды, деп хабарлайды Halyq-uni.kz.
Оралда «Батыс су арнасы» ЖШС, «Жайықжылуэнерго» АҚ нысандары мен сорғылау стансасында су тасқынына қарсы жұмыстар ұйымдастырылды.
«Жайық өзені бойындағы стратегиялық нысандарды тасқыннан қорғау үшін бөгетті нығайту бойынша жұмыстар жүргізіліп жатыр. Қала тұрғындарын сумен қамтамасыз ету жұмыстары алдын ала қолға алынған. Су таситын арнайы көлік қарастырылған», - деді «Батыс су арнасының» бас инженері Аян Тасқали.
«ТЖД: Петропавлда су деңгейі әлі де көтеріліп жатыр»
Солтүстік Қазақстан облысында 2401 үй және 1115 үй маңындағы аумақтарды су басқан. Бұл туралы СҚО ТЖД баспасөз хатшысы Евгений Журавлев мәлімдеді, деп хабарлайды ZHasalash.kz.
Журавлевтың айтуынша, Ақмола облысынан келетін су тасқынының екінші толқыны барысында Ғабит Мүсірепов ауданында су деңгейінің бірнеше сантиметрге артқаны байқалады, ал Есіл ауданында Есіл өзенінің ағысы бойынша су деңгейі азайып келеді.
«Қызылжар ауданында Петропавлдың төменгі жағында су деңгейі әлі де көтеріліп жатыр, яғни бізде Тері зауыты мен Ойқала шағын аудандарындағы үйлерді су баспайды. Онда құтқарушылар жұмыс істеп жатыр, тұрақты мониторинг жүргізілуде, жағдай бақылауға алынды. Еріктілер жұмыс істеуде. Негізгі іс-шаралар өзен ағысының бойында Петропавлдан төмен орналасқан елді мекендерде жүргізіледі. Соңғы тәулікте су Большая малышка, Соколовка, Вишневка, Ольшанка ауылдарына келді, онда 317 үй су астында қалды, 1562 адам эвакуацияланды, оның ішінде 299 бала», - деді спикер.
«Степногорск шенеуніктері миллиондаған сыйлықтарды негізсіз алды»
Степногорск қаласының прокуратурасы қадағалау қызметі барысында мемлекеттік органның қызметкерлеріне негізсіз сыйлықақы төлеу фактілерін анықтады, деп хабарлайды DKNews.kz.
Мемлекеттік мекеме екі жыл ішінде заңнамада белгіленген шығыстардың түрлері бойынша үнемдеу болмаған кезде қызметкерлерге Т13,4 млн сомасына негізсіз сыйлықақы бергені анықталды.
Аталған фактілер бойынша қала прокуратурасы мемлекеттік мекеменің атына қадағалау актісін енгізді.
«Назарбаев қоры қазіргі билікті қаралау науқанын ұйымдастырғанын жоққа шығарады»
Нұрсұлтан Назарбаев қоры қазіргі билікті қаралау науқанын ұйымдастырғанын жоққа шығарады, деп хабарлайды Orda.kz.
«Қазақстандағы су тасқыны маусымының өтуіне байланысты шиеленіскен жағдайдың аясында кейбір әлеуметтік желілерде «Нұрсұлтан Назарбаев қоры жүргізді деген болжам бойынша биліктің беделін түсіруге және қоғамдық-саяси жағдайды тұрақсыздандыруға бағытталған ақпараттық науқан» туралы ақпарат жарияланды. Анонимді дереккөз жариялаған ақпаратты жекелеген БАҚ өкілдері де айтып, олар да негізсіз айып тақты. Нұрсұлтан Назарбаев қоры бұл жарияланымдар мен мәлімдемелердің мүлдем объективті және нақты негізі жоқ екендігі туралы мәлімдеме жасау қажет деп санайды», - делінген қор хабарламасында.
Фото көзі: Reuters